時事新聞
時事新聞
金融財經
各行各業
女性頻道
戀愛婚姻
親子家庭
運動
足球
飲飲食食
旅遊資訊
潮流資訊
鐘錶
購物情報
手機討論
電腦講場
數碼產品
電玩遊戲
電腦及網絡遊戲
身心靈
影視娛樂
音樂世界
消閒娛樂
日常生活
寵物樂園
興趣交流
汽車交流
校園生活
學術及文化交流
香討試點
論壇資訊
貼圖及影片
博彩娛樂
副刊專題討論
副刊專題討論
香港及世界新聞討論
時政文化討論
各區突發事件報料
軍事討論
立法會事務
有線裁員|16年貢獻換來無情雞 陳漢威:體育組變成兩個人打全場籃球
搜尋
▾
搜尋
進階
內文
登入
註冊
收藏版區
請先登入才可使用有關功能
登入
瀏覽紀錄
全部清除
有線裁員|16年貢獻換來無情雞 陳漢威:體育組變成兩個人打全場籃球
副刊專題討論
回覆
追帖
新帖
‹
上一主題
下一主題
›
新帖
回覆
瀏覽: 1,340
+4
列印
生果轉貼員
Golden Member
帖子
44104
積分
47159
註冊
2019-6-1
發短消息
加為好友
有線裁員|16年貢獻換來無情雞 陳漢威:體育組變成兩個人打全場籃球
#1
發表於 2020-12-5 06:53
顯示全部帖子
大
中
小
繁
簡
https://hk.appledaily.com/sports ... _content=photo_post
16年前,陳漢威初入有線新聞報到,他憶述知悉獲聘任體育記者一刻,夢想成真,不由自主叫喊起來。他在荃灣這座大樓,捱過每晚壓力大得發噩夢的日子,經歷過與戰友通宵拼搏的歲月,也找到一生的至愛。然而16年後,曾經的「快樂新聞部」人面全非,劊子手冷冰冰逐個行刑,他捧着一個籃球,在眾多鏡頭前就此揮別。他說,這天其實象徵了優秀電視新聞的沒落。
行內老前輩說:「不要讓記者成為新聞的主角」,偏偏在風譎雲詭的2020年,記者自身終究也成為頭條,12月1日有線突然裁去40名記者,時任體育組助理採訪主任的陳漢威形容,當日如同電影《大逃殺》的橋段,「好似行刑咁,收到電話就入房,你見有啲人係好從容面對死亡,『Yeah!係我!』咁樣,有啲係唔開心啦當然。」他淡然指早已料到這天的臨到,面對老東家施極刑,沒有不快,只是說不出的心痛,「由當初傳倒閉,到新老細接手,一直有心理準備接受呢個結果,但當真係發生嘅時候就真係好心悒同埋痛心。」有線資源短絀人所共知,然而當日派「大信封」的標準看來卻不符減省開資的原則,「你見到入得去嘅人唔係能力嘅問題,唔係因為佢做得差或者人工特別高,只能夠話大部份係嗰組最Top嘅就炒嗰個,標準係點呢就唔知囉。」
1607122413870.jpg
(737.98 KB)
2020-12-5 06:53
「大逃殺」的畫面,陳漢威歷歷在目,其時有線彷彿被劃入異度空間,一面是鐵石無情的殮房,「喺間冷冰冰嘅房度,人事部職員佢唔識我我亦都唔識佢,佢就咁遞封冷冰冰嘅信畀你話你要走喇,我望住隔離主播劉紫鳳,我話咁多年一齊讀新聞、望住你結婚,今日仲要一齊走,我哋坐埋一齊迎接啦, 佢(人事部)唔會講乜人性化嘅嘢,仲話『今朝有同事畀人炒咗,你會唔會知道啲條款?』你見到一間公司係冷冰冰嘅。」走出可怕的殮房,迎接他的卻是天淵之別的溫馨,他表示如同結婚般感動,「一出到嚟係超級warm,港聞、攝影、體育同事,甚至前同事,廿幾三十個人圍住你衝埋嚟想安慰你,嘩嗰刻已經好想喊,我話『唔好再埋嚟,再埋嚟我會喊到停唔到』,結果我都係頂唔順要行一行開先,原來呢個世界好warm,好多人想對你好,呢個真係預計之外嘅嘢。」
1607122414332.jpg
(921.36 KB)
2020-12-5 06:53
突然間熟悉的人情湧現,但有些人和事,有些質素有些聲望,失去了也追不回。2004年陳漢威初出茅蘆,短暫擔任文字記者便專職有線,問他「畸寶」有何吸引?「勁囉!Top囉!」話口未完他即興奮應道。有線體育新聞的優勢,不單單在於出鏡和採訪大型運動會的機會,更是人與人之間的學習與互動,「有線係一個非常欣賞人才嘅地方,領導嘅人都係非常叻、非常熟,以前係趙應春先生同埋馮德雄先生,佢哋對新聞特別有觸覺同抱負,而且有能力,你跟住佢哋一定有進步。」初入行時一次他被派去採訪黃金寶出戰單車賽,比賽甫完他已寫畢旁述稿,他以為交妥功課,在上司眼中卻未達標,「佢哋係要有聲有畫,有Bite(訪問)有扒(鏡頭前報道),原來要求係去到咁樣,隔籬台都唔係咁,但佢哋對一個初級記者就係咁高要求。」他直言當年壓力極大,每晚發起噩夢擔心工作有錯漏,通宵更過後回到公司,案上又收到上司長文,點評表現和改善之處,但正正因為與一眾追求完美的「儍佬」工作,為免白費同伴心血,迫使他每日進步,「呢行係好top,無論記者、剪片、攝影、工程都係,點解會慢咗呀?因為我慢咗囉,因為我,就搞到攝影師嘅心機冇晒,剪片又等緊你喎,人哋神速剪好喇喎。」在上者領導有方,在下的切磋砥礪,歐聯夜波連場,他一個人要兼顧四場球賽,「同一時間睇四場波係會嘔㗎,好似大廈保安睇cctv咁樣,四個畫面喺度郁,耳仔又要聽住電台。」縱然辛苦,但他津津樂道說與志同道合的同事拼搏,苦也苦得高興,「當時一班師兄弟喺度係良性競爭,你同一時間寫到四隻,我第日都要寫到四隻,甚至要寫到五隻。」有人視廚師常吃宵夜的餐廳為質素保證,陳漢威說行家視有線為參考對象即反映其水平,「個感覺好自豪,快而準,我係有線嘅。其他公司會話『Cable出咗咩?我哋要跟;Angle(角度)開咗咩?我哋要跟。」
1607122414419.jpg
(945.9 KB)
2020-12-5 06:53
昔日的輝煌恍如隔世,但冰封三尺非一日之寒,新聞部資源不足早預兆有線崩壞,2012年有線奪奧運轉播權,新聞台與體育台超過50人浩浩蕩蕩前往倫敦,陳漢威在現場見證李慧詩衝線得獎一刻,「好似睇波咁,成個場係震㗎,當時因為英國車手攞冠軍,你嗌李慧詩個名其實係冇人聽到,在場所有行家就變咗李慧詩打氣團,嗌到出唔到聲都會幫佢加油,場面係好感動。」輾轉來到2018年雅加達亞運開鑼前夕,有線於開幕不足一個月才獲轉播權,臨急派員採訪,「最後連埋體育台得八個人去,資源有幾盡削到幾盡,以前可能會話租架車,今次就直情自己搭的士啦。」他指有線就如一隊損兵折將的籃球隊一樣,無論場上情況如何惡劣,球員繼續緊守崗位應戰,「打籃球最正規係五個人打,你削到我得四個人,我都照打落去,但係得返三個人去打全場嘅話,其實就已經唔係五個人打全場嗰樣嘢。」
全盛時期體育組曾經同時有九名記者在陣,但如今陳漢威和林普斯兩名資深記者雙雙被裁,有線體育僅餘兩名全職記者,「點樣用兩個人去打全場嘅籃球呢? 就係咁,佢哋已經盡晒力,拗晒柴都照打落去。」我問假如以足球隊比喻有線呢?他想一想,苦笑道:「可能似巴塞隆拿咁。」彼邦的班霸球隊管理失誤,戰績下滑,主將被掃出門,軍心渙散;對比巴塞的衰落,最教陳漢威心傷的不是被公司辭退,更是市民失去接觸具質素的電視新聞報道,本地運動員也少了一個曝光的平台,雖然網絡發達,文字媒體尚在,但他認為始終不能彌補電視畫面的震撼,「有啲嘢係要有畫面去交代,例如何詩蓓贏咗比賽,係因為我哋買咗轉播嘅片先可以報到出嚟。」
米已成炊,雖然告別有線,但陳漢威心底依然有個未竟之夢,「我覺得(體育新聞)點都係要本地行先,我做唔到一半,起碼都七三吖。」遙想當年無綫猛削體育新聞時段,這邊廂陳漢威一直極力爭取本地體育於電視新聞的曝光率,「初初入行嘅時候啲人話係七三,其實係九比一,首先佢哋係本地運動員,其次我哋用咗咁多資源,有攝影有車長有工程,記者咁辛苦做個專訪返嚟,點解唔可以篇幅多啲,重要性大啲。」無可奈何於香港社會,歐洲足球支持者眾,本地體育經常淪為配角,他指即使李慧詩、江旻憓成為世界頂尖運動員,港人依然無甚關注,「你去過歐洲、日本睇人哋個奧運冠軍、世界冠軍甚至只係學界冠軍,人哋嘅篇幅同埋respect係幾大,係鋪天蓋地。」
時段有限,資源有限,從預約攝製隊,剪片先後次序,那怕是多一秒鐘的報道,無一不是角力爭取,但他補充指相較其他電視台,惟獨有線才會相對重視體育,「得有線先會提升到體育上頭條,其他台你唔會睇得到重要性,但係有線先會咁放資源,就算未攞金牌,入到四強都要即刻出街。」人先自重而後人重之,這一切某程度上源於體育記者的熱誠和積極,「其他人睇到你嘅付出、質素同熱誠,佢哋會尊敬你,有時排cast(節目內容)嘅同事話今日真係好爆,好多國際同香港大事,但佢點都會留返三分鐘畀你出,有時冇乜咁多嘢就畀返五分鐘你,其實佢一聲令下可以三分鐘都唔畀你,你自己respect一件事,人哋咪respect返你囉。」
16個寒暑就如此過去,行內常說體育記者四年一循環,本來他只打算當四年體記,去過世界盃、奧運、亞運、全運便心滿意足,結果他超額完成,足足在有線待上四個循環。也許明年他再也不能以記者身份赴東京替香港運動員打氣,但愛好運動的他也離不開體育圈,「我一早有心理準備,我自己又係個非常之鍾意運動嘅人啦,所以上年就考咗一個加拿大滑雪板教練執照,之前已經考定體適能同健身教練, 又因為好鍾意玩wakeboard(花式滑水)同wakesurfing(無纙滑水),所以都有一個船牌喺度嘅。做咗咁多年嘢,家陣我都想休息一下,諗吓自己究竟有咩去向,有咩發展。」
電影《劫後重生》中,主角湯漢斯流落荒島,靠一個Wilson排球慰藉孤單心靈;有線大裁員那日,有人手抱紙皮箱離開,有人拖行李箱告別,陳漢威卻拿着籃球推門而出,他說本來相約舊同事打籃球,結果噩耗傳來,又攜同籃球返回公司接信,他自忖要執拾的物品太多,倒不如簡單輕裝離去,他笑說,「我想輕輕的來,輕輕的走, 實質上帶走個籃球係因為覺得嚟緊打波緊要啲,遲啲一定會好多時間打籃球。」豈料他離開個多小時後,政府隨即宣佈因應疫情嚴重,封閉所有球場。
果然是2020年的香港,沒有更壞,只有更壞,現實往往比人要能想像的更差。
。。。。。。。。。
鳥盡弓藏,兔死狗烹。此地不留人,自有留人處!
UID
6650154
帖子
44104
精華
0
積分
47159
金幣
8632
閱讀權限
80
在線時間
4627 小時
註冊
2019-6-1
最後登錄
2024-4-24
查看詳細資料
派糖
回覆
引用
TOP
熱門主題
政府建立一套統一商業登記及公司註冊發牌系統
台灣係中國一部份,點解大陸冇送物資或搜救隊到花蓮?
華為退休員工講述行業內幕,這么多年華為經歷了什么?
對傳呼機有意見
學童教育 / 一場無休止的堅強
公屋|拆廚房門隨時「一身蟻」? 亂裝修最嚴重中止租約 即睇邊啲固定裝置唔可以隨便拆!
相關主題
與葉維昌對話——我為何從戰地工作走到青年工作?
新帖
回覆
‹
上一主題
下一主題
›
[按此打開 Google 相符內容]
[按此隱藏 Google 建議的相符內容]