• 瀏覽: 1,631
  • 回覆: 2
  • 追帖: 1
[隱藏]
話說今天9月23日早上10:20 (看以下附圖)收到中通提貨短訊,於是今天即日下午接完個女放學5:00帶同短訊去取貨,鋪裏邊有一個男人要求我俾$16運費加$40存倉費。我問佢點解我即日嚟攞都要俾$40存倉費,佢話件貨其實兩日前已經到咗倉,我同佢講我今朝先收到短訊俾佢睇,佢拒絕睇,堅持要收我存倉費,我叫佢俾我睇佢電腦嘅資料,佢拒絕。
我拖住個四歲嘅女,費事同佢嘈,於是我就話:「 我買件貨都係百幾蚊,你要我總共俾$56我覺得唔合理,算啦,一人讓一步,我俾$16運費加一半$20存倉費」個男人話好,於是我就俾錢,當我行出門口差唔多到扶手電梯口嘅時候,佢突然之間走出嚟好大聲咁同啲街坊講:「冇錢就唔好學人買嘢啦,食霸王餐...」

我好嬲,於是就返轉頭同佢講:「我幾時冇俾錢?」佢話,我屈佢存倉費。我話:「唔緊要,我知道都未必係你嘅問題,可能係中通系統出問題,既然你條氣唔信覺得收少咗錢,我又覺得你冤枉我,咁不如大家一齊打電話去中通問過明白。」佢拒絕,話叫我自己打。我話:「你係提貨點,我係客人,理論上冇理由係我打;就算我打完之後講俾你聽你都唔信,不如大家一齊打。」跟住鋪裏面個女人就走出嚟,將張$20蚊紙掟落地下,然後好大聲咁講:「我依家唔收你錢,當送走你個瘟神⋯⋯」。我話: 「理論上根本連$20存倉費我都唔應該俾,就算你而家俾返我,我都係應得嘅。」跟住我就轉頭走。

當我又差唔多走到去扶手電梯口之際,佢兩公婆就好大聲嗌:「仲話做人老母,大教壞世,唔俾$食霸王餐,仲喺度大大聲聲理直氣壯。」

我好嬲,又走番轉頭:「你幾時唔收我錢?就算我攞返嚟呢$20 ,你都收咗我$16 」個女人好惡咁話: 「我冇收你存倉費!」我話: 「根本我就唔應該俾存倉費,上晝收短訊,6個鐘頭之後嚟攞,你收我$40存倉費,咪仲貴過迷你倉!我俾你睇我嘅短訊你又唔肯睇,我話打去中通問你又話唔好,我已經算啦費事同你嘈俾咗$20你,你話好,收完錢之後我本來都已經走咗行到出扶手電梯口,你老公又走出來大大聲鬧我,然後又輪到你掟啲錢俾我,我再走,走咗兩次你兩公婆都走番出嚟大大聲聲鬧我⋯⋯你咁樣對客人嘅咩?呢啲係乜嘢服務態度?」

周圍店舖裏面啲店主走晒出嚟,跟住佢就好大聲繼續話:「幾十蚊都喺度斤斤計較,未見過啲人咁cheap。」我話:「好似依家係你兩公婆為咗幾十蚊同我計⋯⋯我前後走咗兩次,你哋兩公婆都走出黎大大聲聲鬧我。你既然覺得有問題咁點解唔肯大家一齊打去中通問過明白?呢啲唔係錢嘅問題,係原則嘅問題」跟住個女人就話:「我今日出咗咁多件貨,全部都問冇問題,係得你有問題,我唔覺得係關中通時囉,係咪你自己個電訊商收唔到短訊咋,自己有問題就喺度周圍賴人」。

佢兩公婆不斷咁好大聲喺度話我唔俾錢食霸王餐,唔俾錢,搞到執邊舖頭啲店主都走出嚟叫佢兩公婆算數,佢仲要喺度講,跟住我好嬲: 「唔俾錢嘅定義係$1都唔俾,而家我有俾$16運費你,你而家周圍同人講話我食霸王餐唔俾錢,唔緊要咪搵差人嚟。」 但係佢兩公婆又死都唔肯.....繼續喺度咿咿吟吟,話今日唔知行乜衰運撞到D瘟神,仲話以後唔做我生意,叫我過主⋯⋯

最後,我拖住個女費事同佢嘈就走咗,但係我真係好嬲!😡😡😡😡😡😡😡

有冇方法可以投訴佢哋!?





回覆 引用 TOP

即日都有存倉費?咁咪變相加價幾倍?
買得網購主要係因為價錢

我會唔理佢地直接打電話問
如果中通話點都要俾存倉費
就要求中通寫明 (以後唔用呢間)
如果佢地堅持
直接報警
我唔介意用一日同佢地玩



raiyu

回覆 引用 TOP

雖然系佢唔對,但換我性格,帶住個女,我系唔會同佢吵既。費事影響小朋友


回覆 引用 TOP

[按此隱藏 Google 建議的相符內容]