• 瀏覽: 336
  • 回覆: 1
[隱藏]
歌仔有唱「人群裡為人群顧慮 逃離總有逃離空虛」,如果一個人要面對責任,但佢選擇咗逃避甚至逃亡,就算佢暫時唔駛面對問題,內心都必定有後悔以至空虛伴隨。就好似一啲喺7.1衝擊立法會之後「流亡」去台灣嘅所謂「義...

之前已經有報道講過佢哋留喺台灣又唔容易、返嚟香港又極可能面對刑責,「兩邊不是人」,噚日喺一個反政府人士嘅所謂「民間記者會」上,就有人「聲淚俱下」讀出三名「流亡」台灣人士嘅「家書」,有人對做逃兵感後悔,亦有人嘆謂喺台灣「不能公開身份」。廣男對於呢啲「流亡」故事,只能講一句,早知今日,何必當初?


後悔因為未能「做更多」?


唔好誤會,有所謂「流亡」人士話後悔,唔係話佢為自己做錯事、涉嫌犯法而後悔,而係因為覺得自己能夠喺「運動」中「做得更多」而後悔;至於話自己唔可以公開身份嘅「流亡」人士,就因為喺台灣見到台灣人整連儂牆,因為唔可以公開身份,所以只能「低聲抽泣」。廣男就覺得,佢哋之所以「感觸良多」,歸根究柢,係因為佢哋一方面唔敢返香港面對責任,要離鄉別井,另一方面就算去到台灣,都猶如「非法移民」一般,想露面都有困難;而佢哋表面好似唔驚咁,但實則內心極度恐懼,所謂後悔唔能夠「做更多」,廣男感覺都係裝出嚟煽動他人嘅「假面具」嚟啫。


如果大家留意報道,會發現其中一名「流亡」人士表示佢自己人在異鄉,感覺有如外人,佢自己亦唔想其他抗爭者同佢一樣流離失所。廣男認為,如果唔想「流亡」,唔想去到其他地方變「外人」、流離失所等等,最好嘅方法,就係唔好犯法,唔好做啲令自己後悔嘅事;今日呢幾位「流亡」人士係人辦,如果其他示威者堅持要抗爭落去,就一定有被捕風險,如果「流亡」,就會好似呢三位甚至更多「流亡」人士咁,過住顛沛流離、內心惶恐不安嘅生活!


與其痛苦恐懼 不如回港


喺呢度,廣男有個建議,就係啲「流亡」人士與其擔驚受怕、喺台灣過住「外人」、唔見得光嘅生活,不如勇敢啲返嚟香港面對責任;無錯,返嚟香港好可能會被拉、被告,但係佢哋起碼唔駛再怕隨時俾人拉,又唔駛怕隨時俾台灣當局「踢走」,內心亦唔會咁不安。至於其他年輕人、示威甚至暴徒,既然已經有前車可鑑,實在無必要以身試法,否則今日「流亡」台灣嘅所謂「義士」,明日就可能係你自己!


原圖:中通社

新聞來源連結:
https://www.speakout.hk/港人觀點/49081/-義士-後悔做逃兵-



回覆 引用 TOP

·有咁耐風流,有咁耐折墮,暴動時何等威武,何等興奮,何等陶醉,現在是折墮的時間。


回覆 引用 TOP

主題標籤 #立法會
[按此隱藏 Google 建議的相符內容]