二星級會員
- 帖子
- 246
- 積分
- 244
- 註冊
- 2017-3-27
|
#1
發表於 2019-9-16 13:40
天地良心真係唔係click bait，亦都唔係劉備扮唔好意思拎陶謙地盤，係要啲手下三催四請好啦勉為其難我做住先。上篇講Fact check，講confirmation bias，非我本行（（http://bit.ly/32IU7w6））。踩晒過界，又講新聞，仲講到心理學同Cognitive Science（後悔冇讀，好多女的說），應該搵我朋友朱大班（係呀，嗰個朱大班，又，唔係女嚟的）嚟講下。
不過冇所謂，你見我明明講港交所羅密歐，都變咗講英國文學，意大利旅遊，波斯尼亞歷史，同埋意大利足球。（http://bit.ly/32EPPFI）
仲要好似自吹自擂講自己好醒唔中計咁。真係預計個內容趕客，但結果反應幾好，咁所以先有下集。
首先要講，其實係好精神分裂嘅。做金融，做分析員基金經理或自己炒，反而唔好咁多Fact check。因為水清則無魚，股票（其實大多數資產都係）炒預期。無論你覺得國泰買快運，港交所買倫交所，正面定負面，成唔成事，都一定係第一日就郁。到你落實先？乜都郁晒啦。經濟一樣，你望下2008年香港GDP按年仲有得升，去到2009年先按年大跌-但2008年中秋雷曼爆煲（其實之前已經係），乜都散晒啦，我等你2009年嘅GDP出嚟先沽？而2009年買返晒上去啦
但幸好，嘻，其實我係一個數學愛好者（唔好意思話自己讀數學，因為精算呢，狹義嚟講，應該……唔係數學）。
正題，無數咁多人都講media literacy，媒體素養，教你點分辨假新聞。但絶大多數都係把撚。原因好簡單，正如你叫人戒煙，你叫人唔好食薯片，做愛要用套，有害呀後果嚴重呀。食嗰個唔知咩？但過癮丫嘛！
假新聞一樣，點解會些？固然我話你知啲人本身就係戇鳩。但佢唔會無啦啦去飲苦茶嘛。點解食薯片？因為，過癮！
點解過癮？因為上帝（如有）做人就做到你咁。請返原廠投訴。
潮流興講STEM。而家唔知，我年代第一堂科學課，必定同你講科學方法之類嘅悶嘢，歐思考試唔敢考。另外，會話你知，人嘅感官係唔可靠嘅。好多實驗都玩過，包括兩條線望落唔同長度其實一樣，包括出名嘅藍黑白金裙，仲有包括你兩隻手指一隻擺冰水一隻擺熱水然後一齊放返普通水（嗰時唔知咩叫冰火，嘻）
呢啲實驗都話你知，人嘅五感都係唔可靠。所以科學老師教你乜？就要有儀器去量度。眼見未為真，唔好信自己對眼。
人腦，亦都一樣。
要強調嘅係，睇完呢堆嘢，唔代表你會叻咗，或者可以避免思維陷阱—呢種諗法本身就係一種思維陷阱。你可以諗下，你知道自己感官唔可靠，但唔會因為咁你隻眼勁咗，亦唔能夠因為咁你練多啲隻眼就好啲。冇嘅。大腦都一樣
咁有乜用？好似就係我舉個例嘅呢本書講。你知道點解會行雷閃電，唔會令你防止到佢。你有避雷針，亦唔代表你會少啲見到行雷閃電—但，你唔會好似古人咁驚，以為係不孝畀雷劈
同樣地，你知道自己個腦係有問題，你自然會搵其他方法去小心啲。呢啲就係＂大智若愚＂嘅精神。廢柴永遠最撚自信。
四十年來我聽好多故事好多實驗，以下係其中一個最有意思嘅（另一個係「看不見的大猩猩」）
我地玩嘅遊戲，好多都係演繹法（Deduction），較少係歸納法（Induction）．唔做邏輯撚去講分別，好簡單嚟講，前者先有規則，後者呢，就你去估個規則。
呢個遊戲係就估規則。你睇到張圖啦
2,4,6,8。唔係問你下一個係乜（其實係乜都得），而係，你去估下背後呢個數列係咩規則。出題者一早寫低咗，冇得搬龍門。你做嘅就係去估呢條規則。
點估？你可以寫數字上去（或者口講），出題者會話你知，符合規則，或者唔符合。任你寫幾多，玩到夠為止。但，只準估一次。
正常人（姑且叫正常人隊），就梗係會試10。就算你知有古惑，冇問題丫，無限試嘛。咁你試10。出題者答你：符合規則。
你再試12，符合規則。14，符合規則。16，符合規則。
所以，真容易啦。你話我估到。個規則就係「每次加二」。出題者話：錯。玩完
第二組嘅學生，唔係咁玩。佢都係一開始試10（你當佢睇唔到第一組玩嘅情況啦下，但無關重要）。符合規則。12，符合規則。但佢之後試4，唔符合規則。14呢？符合規則。15呢 ？符合規則。7呢？唔符合規則。負23呢？唔符合規則。17.5呢？符合規則
於是呢種學生就估：個規則就係，下一個數要比上一個大。Bingo
唔使拗細節，個重點係，兩種思維嘅唔同！
第一組學生，估到條規則係每次加二，冇問題，好合理。但之後佢地做乜？佢地係不停咁搵嘢去支持自己嘅諗法。12啱喎，14啦。14啱喎，16啦。咁不如18。搞掂。然後以為自己好撚醒— 因為就如你預計咁發展嘛！證明到我理論！世事如我所料！不知幾開心。
第二組學生，其實開頭都應該係估條規則係每次加二。但，佢唔係去不停assume自己自己啱。相反，佢係獨孤求敗，希望去搵到「證偽」。我估條規則係每次加二，咁，點解我要試10,12,14咁去飛機？我梗係試其他啦，可以試下7，試下13，試下負數，試下小數。其實試到13你就知，最初嘅「每次加二」係錯嘅。
呢個故事就話你知，人係幾咁容易有confirmation bias。你想避免？你要謙卑，你要諗：可能我會錯喎。我搵啲有機會推返我假設嘅嘢去試—而唔係搵啲有機會＂證實＂我假設嘅嘢去睇。
所以，你見到話政府會回應多一個訴求時。你唔應該去睇差佬取消記者會嘅新聞—睇完你咪更加堅信你原本諗嘅嘢—相反，你係應該去彭博部機，或者去南早網站，睇下到底有冇呢篇嘢—因為搵到嘅嘢可能會掃你興。
破除confirmation bias，其中一個方法，就係不停咁掃自己興。邊有咁理想，咁好嘅嘢點會發生在自己身上。女神肯同你啪啪啪？打巴自己啦，應該係發夢。幾廿歲人唔好咁多性幻想。
但，confirmation bias係人性，而去fact check，係違反人性的。所以點解我都仲係呢個城市嘅癌細胞。癌細胞嗜甜，我就係呢個城市嘅癌細胞。因為實在太好食啦。你叫我日日食麥皮，you don’t actually live longer, it just seems longer
最後講個，我應該冇講過嘅故事。睇下有冇人有共鳴。
呢個故事，出自「城市故事」。洗米華（梁思浩，唔係周焯華）嗰套。
個故事，正係謎語，夠應節，中秋燈謎。謎面2,4,6,8,10。估一個地名
我記得兩組人係咁拗，一組話謎底係重慶。越嚟越大嘛。另一種反駁，扯，咁你個謎面係1,3,5,7,9都得啦
另一組話，謎底係齊齊哈爾。嘻，齊齊加二嘛（其實不如估「嘉義」）。咁第一組又反駁，扯，咁你個謎面係1,3,5,7,9都得啦
然後結果有條友，無啦啦諗到個答案：不丹
拿，呢啲就偽證啦！
你睇，人地睇城市故事睇劉淑華何美婷，我就留意埋呢啲嘢。抵我變哲學家，冇女溝。
我仲有一個實驗講，呢篇反應好（其實好唔好就我話啫），下篇再講。保證唔會寫咁長。
原文 http://bit.ly/2klTgAT
呢條李聲揚偶有佳作
|
|
|
|
[按此打開 Google 相符內容]
[按此隱藏 Google 建議的相符內容]
|
|
/https://img.discuss.com.hk/d/attachments/day_240417/20240417_9e9d5ec501dec7cff9d3qCYJza6pRonV.jpg)
