註冊 登入



打印

中環及灣仔繞道1.20通車 自製懶人包

中環及灣仔繞道1.20通車 自製懶人包 E-mail 此主題給朋友

[隱藏]

用左9年洗咗成360億嘅中環及灣仔繞道係今個月20號禮拜日朝早8點終於通車喇。

對於每日係港島住/返工塞車浪費好多時間嘅人(包括小編)真係個大喜訊。

同日塞夜塞o既告士打道說再見。


好多傳媒同議員成日都話好擔心通車後會搞到中環大塞車, 照計多咗條大路點都會好咗嫁, 真係黑人問號

小編睇咗運豬署, 慈母, 傳媒, IG, FB唔同嘅資料, 連百萬行d人拍果d片都睇埋, 終於明晒d 走線點行,等我整番個懶人包幫幫大家。

1. 原來20號第一階段通車果陣,西行由東廊出咗隧道係仲未去到林士街天橋! 想去"西區"要跟"中區"嘅路牌出返畢打街近交易廣場u-turn先得! 玩嘢咩,咁我行舊路仲好過啦!! 好似要成一個月,即係2月中先開到。咁d議員今次又講得o岩喎。

2. 林士街天橋東行斜路係20號凌晨就永久byebye, 運豬署叫人東行轉去行中環海皮一帶。喂! 無嘢呀! 封咗條大路叫人行咁多燈位嘅路。擺明去唔到水啦。
小編上個禮拜專登揸架愛駒去果頭走咗兩轉, 又唔係太差喎。橋面開果陣應該有兩條行車線, 落到去IFC個燈位有4條線, 見到有個大banner 叫人去邊都直行, 跟住有個廻旋處右轉, 出到龍和道同係軍營, 大會堂轉返出大路停咗兩次燈, 都唔算太差, 不過留意番,係禮拜日。希望政府真係會校下d燈, 唔係就塞到爆膀胱。

3. 林士街東行天橋封咗, 上游無晒車, 行下路落畢打街隧道東行去銅鑼灣分分鐘仲爽, 但小編行過果度係雙白線, cut 唔番去右線落隧道。 傳聞,運豬署係記招度話通車後會改, 今日睇運豬署youtube D片好似真係會改。梗係要啦,唔係條畢打街東行隧道就封塵啦。

4. 慈母強調隧道入面係唔准轉線, 運豬署就話係天后西行清風街入咗隧道會喺快線直去中西區, 但可以係隧道口前約200米由快線cut番出中線再靠左出中環或者機鐵站。又黎黑人問號喇, 隧道咁多cam, cut 雙白實捉到, 科水事少, 扣分上堂事大。為咗解答呢個問題, 我睇晒路政署成廿幾頁個駕馱指南, 問埋職安真漢子老友。原來運豬署今次講啱咗喎。 諗諗吓都要啦, 有幾多人會由天后直接去西區呀。運豬署D片都見到少少。

5. 真漢子老友話隧道入面好多快相機, 轉速位一定有裝。隧道行80東廊行70, 唔記得收油隨時收信。灣仔落隧道條路行50但好斜, 唔踩brake又可能中招, 到時又要上堂。(小編試過一連兩日比人扣左11分)

6. 講真,我睇Google Map中環近四季酒店出口嗰個彎都真係幾急,各位巴打絲打出彎果陣時真係要打醒十二分精神,要小心d, 唔係就做通車後一滴血。

7. 直到今日11號, 都無一個導航係有繞道嘅, 通車初期睇黎都唔方會有。 其實今時今日仲有幾多個人會揸車睇牌行, 出車前都係睇清楚條route穩陣d。 運豬署個西有D建議行車路線同短片,今次都算清楚,唔熟港島路o既巴打絲打可以去睇下。

中環拆左橋之後大改道,小編早兩日坐的士問大佬通左車d路點行佢地都唔係好清楚,出門前各巴打絲打真係要睇清楚。

最重要係, 宜家d油咁貴, 中環本身已經多車, 通實初期又肯定會引左d人黎試路,無必要渣車o既巴打絲打可以等通左車一排睇下反應先試玩,行錯路塞車嘥錢嘥時間, 遲到少少又比腦細扣勤工, 各位自求多福喇。

希望幫到大家

慈母
https://www.youtube.com/watch?v=JJhQDoiUZ5w&feature=youtu.be (個阿SIR幾靚仔、注﹕小編係直o既)
運豬署 https://www.td.gov.hk/tc/cwb/index.html
路政署 http://www.cwb-hyd.hk/tc/index.php

[ 本帖最後由 Terzaghi 於 2019-1-13 02:12 PM 編輯 ]進入香討影片區



精選樓盤
引用:
原帖由 Terzaghi 於 2019-1-11 08:57 PM 發表
https://resource01.ulifestyle.com.hk/res/v3/image/content/2180000/2180050/20181010_road_01_1024.jpg
用左9年洗咗成360億嘅中環及灣仔繞道 ...
學你咁講,不如行番舊路



回覆 引用 TOP

不過小弟平日都係坐地鐵,港島D路面交通見到都眼冤


回覆 引用 TOP

[按此隱藏 Google 建議的相符內容]




重要聲明:本討論區是以即時上載留言的方式運作,香港討論區對所有留言的真實性、完整性及立場等,不負任何法律責任。而一切留言之言論只代表留言者個人意 見,並非本網站之立場,讀者及用戶不應信賴內容,並應自行判斷內容之真實性。於有關情形下,讀者及用戶應尋求專業意見(如涉及醫療、法律或投資等問題)。 由於本討論區受到「即時上載留言」運作方式所規限,故不能完全監察所有留言,若讀者及用戶發現有留言出現問題,請聯絡我們。香港討論區有權刪除任何留言及拒絕任何人士上載留言 (刪除前或不會作事先警告及通知 ), 同時亦有不刪除留言的權利,如有任何爭議,管理員擁有最終的詮釋權 。用戶切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。


Copyright©2003- Discuss.com.hk Limited. All Right Reserved.
版權所有,不得轉載。