一句到尾,唔係真係想去外國工作同生活,係想攞個外國身份咁當香港情況去到太壞嗰陣都有條後路。
外國生活其實係高質過香港好多。人地地方大,空間多,樓價冇咁貴,啲人整體質素都好過我地,最緊要係政治比較穩定同表面上尊重人權。 問題係,我地香港土生土長生活咗幾廿年,文化同生活習慣根本好難改,亦都唔想改。所以雖然人地客觀條件似乎好過我地,講生活我始終都係揀香港。
工作方面都係一樣。人地個經濟體睇落好過我地好多。人均收入高過我地一大截,科技同營商哲學都領先我地好多。但係我地去到喺人地個社會入面一定企唔番我地喺香港嘅位置。我嘅意思係喺香港我可能係一間外資銀行做一個 Director,去到紐約可能只可以做一個文員。唔係話自己能力唔夠,亦都唔係話人地個經濟冇發展機會。好現實,我英文點好都唔夠啲鬼佬。仲有,我點熟人地嘅社會文化都冇可能好似當地人咁熟。所以對我地呢啲人呢講,工作一定係留喺香港,唔使諗。
雖然生活同工作係香港,有機緣嘅話攞一個外國身份係好重要。講真,我唔理你政治取向,香港近呢幾年咩情況,大家心照啦。再係咁繼續差落去,始終都係要走架啦。只係希望可以拖多二、三十年,到退休先走。