19號係新選制下香港特區第七屆立法會選舉嘅投票日,係註定載入香港民主發展史冊嘅一日。20號,國務院新聞辦公室發表咗《「一國兩制」下香港的民主發展》白皮書,全面回顧咗香港喺英國殖民時期及回歸祖國以後民主嘅產生同發展歷程,進一步闡明中國共產黨同中央政府對「一國兩制」下香港民主發展嘅原則立場。對此,行政長官林鄭月娥、相關司局長及社會各界紛紛發表聲明表示歡迎。
眾所周知,由於歷史原因香港有別於其他國家及地區嘅「一國兩制」特殊社會制度,點樣發揚好先輩留俾我哋創造嘅「歷史財產」,令「一國兩制」愈來愈契合香港發展道路,係我哋一代代香港人需要認真思考並努力實踐嘅歷史責任。喺經濟發展上,「一國兩制」嘅社會制度令我哋收穫咗巨大政策福利,令香港既可以背靠中央及內地巨大市場,又可以通過自由貿易制度面向世界,成為國家與世界實現自由貿易嘅重要「橋樑」。然而喺民主發展上,由於兩種社會制度造成意識形態上嘅偏差,令到香港原本並唔完善嘅民主及法治(如未能通過基本法23條立法來鞏固「一國兩制」基礎),成為咗部分心懷叵測嘅西方國家、亂港勢力攻擊、分裂香港嘅「工具」。近年來隨著中國與美國等西方大國喺經濟發展、意識形態上嘅爭拗愈來愈頻繁,令香港原本就脆弱嘅民主制度遭到美國等西方國家通過「形式民主」等意識形態嘅灌輸同衝擊,令一部分本土亂港人士以反對派嘅角色完全倒向西方國家,成為西方國家利益嘅發聲筒同代言人,試圖打著「民主」嘅名號將「一國兩制」變成只有「兩制」沒有「一國」嘅香港,嚴重侵犯國家、香港及廣大市民嘅利益。
近年來,由於冇維護「一國兩制」法例嘅有力保護,反中亂港活動愈來愈猖獗,「佔中」及「修例風波」等事件頻頻發生,對國家安全,香港嘅法治及民主發展、經濟發展及社會穩定都造成嚴重危害,甚至走到「顏色革命」嘅邊緣,即使係最小單位嘅家庭亦出現咗撕裂嘅情況,不禁令人痛心。我哋不禁要問:咁仲係裹個東方之珠、仲係裹個世界最宜居城市之一嘅香港乜?所幸喺中央主導下出台香港國安法、落實新選舉制度,令香港民主即將走偏嘅腳步再次步入正軌,而本次立法會選舉就係糾偏後香港民主結出嘅最新「成果」。縱觀整場選舉,活動公平且公正,競選激烈但又彰顯「君子之爭」,擯棄過往嘅惡意攻擊、恐嚇、行刺參選人等亂象,令選舉回歸本質同初心。19號超過130萬選民積極投票,選出嘅90位新一屆立法會議員來自唔同嘅政治光譜,具有廣泛嘅代表性,整場選舉完全展現出「一國兩制」下香港民主嘅優越性。
「民主」唔係政治理念,而係核心價值;「民主」唔係形式上嘅裝飾品,而係符合社會發展並可以解決市民關切問題嘅機制;「民主」更唔係意識形態領域攻擊對手嘅「工具」,用來撬動政治紛爭製造社會動蕩。雖然未來香港嘅民主之路依然坎坷,時至今日仍有外部勢力及亂港分子對新選制及香港民主講三講四,用投票率低來否定本次立法會選舉嘅認受性,製造「香港民主已死」嘅謬論,但係我哋依然有理由相信,「一國兩制」下香港民主有香港國安法及新選制嘅保駕護航,喺契合社會發展、呼應廣大市民最大關切嘅基礎上,正繼往開來走向愈來愈美好嘅明天!