呢排確診個案日日創新高時，其實已經有專家講，傳播系數已經由今輪爆發一開頭接近 4，跌到最近就快到 1
傳播系數即係一個患者平均可以傳染比幾多人
咁由 4 跌到高過 1 少少係咪減輕左呢。當然係。但係呢個時候可以放鬆未？絕對未。
1 先係真正既臨界線，傳播系數係 1 以下，傳染到既人數就有盡頭
比如話傳播系數係 0.9，平均每個患者傳到比 0.9 人，個 0.9 人傳到比 0.81 人, 0.81 人傳到比 0.729 人...
學過下高少少既數學, 都知呢條數列既和必定係有限，呢個例子中既和就係 10，即係傳播系數 0.9 下，計晒所有二代三代四代到N 代傳播, 宜家每 1 個病人就會多 9 個病人
仲有, 傳播系數越低傳染鏈越易控制，傳到既人就越少，即係傳播系數係幾代會更低，最終一定唔會有咁多人
但係，高過 1 呢？比如話 1.1
1 + 1.1 + 1.21 + 1.331 + 1.4641 + ...
小學生都知呢條數無窮無盡, 越加越大
更大鑊既係, 人越多, 越難控制疫情, 比如話人太多就算確診都要等入院, 期間又感染多兩個
即係病毒越傳越快, 傳播系數本身會越黎越大
傳播系數 1 以下同一以上, 一邊天堂, 一邊地獄
美國兩三個月前抗疫開始見效, 傳播系數不斷跌緊時, 白宮果幾個智將選擇左地獄
結果大家都有眼見
當然美國好多人都唔重視
FEDEX 有班機師前排投訴香港既抗疫措施過嚴
因為佢地有同事係香港確診但無症狀, 比香港捉左去醫院, 連埋密切接觸者都要強制隔離
佢地認為香港唔應該逼佢地入院同隔離, 罷飛香港
相當一部份美國人有咁既觀念時, 仲有乜野可以期望?
香港宜家又係, 一念天堂, 一念地獄.
我唔係話禁堂食就係萬能, 禁堂食傳播系數就立即跌到0, 無可能
但係，畢竟之前的士司機群組的確係餐廳感染，禁堂食肯定可以減到傳播系數
由 1 以上少少, 減到 1 以下少少, 短時間未必好覺, 長時間就係天堂同地獄既分別
政府一刀切做, 宜家好大反彈, 要撤回, 都無辦法.
有地方食飯既人, 無理由道德綁架無地方食飯既人
但政府做唔到, 唔代表正常理性既香港人無野可以做.
可以避免去餐廳堂食, 就盡量避免, 留返位置比真係搵唔到地方食既人
公司食同餐廳食, 好唔同.
你係公司食對既係一間公司既同事.
去餐廳食, 無口罩同十幾廿間公司既員工同處一室, 然後佢地返公司, 等於你接觸十幾間公司既同事.
果十幾間公司, 仲會日日換. 一個星期你間接接觸到既, 可能係一百間公司既同事, 幾千人.
因為病毒係空氣唔流動既室內可以飛好耐, 就算個隱形病人食完你先入去, 你感染既風險都唔低.
再講一次, 宜家真係好關鍵, 將傳播系數壓到 1 以下, 就係天堂, 忍唔到放鬆左, 維持係 1 以上, 就係地獄.
宜家, 就係臨界點.
[ 本帖最後由 wilsonkf 於 2020-7-30 08:49 PM 編輯 ]
搭升降機又好，已經不似幾個月前咁保持距離
