【明報專訊】書展噚日開鑼，咩事令到保衛香港運動嘅傅振中成班人拉晒banner去書展呢？原來佢哋唔係示威，而係去支持一個叫做張達明嘅人，舉辦新書《何為證據：揭露香港亂象的幕後黑手》簽名會。作者張達明話2014年時係城大博士研究生，本書係要踢爆2014年由鄭宇碩牽頭嘅真普選聯盟同佔中運動，「勾結外國勢力禍港」嘅幕後證據。
張達明話，2014年喺城市大學當代中國研究計劃做高級研究助理，上司係鄭宇碩教授，佢話鄭參與華人民主書院、真普聯同民主動力等團體活動，佢曾經協助鄭處理好多相關檔案，就靠呢啲檔案內容寫書。張達明又指控真普聯曾經接受美國國家民主基金之下美國國際民主研究院（National Democratic Institute for International Affairs, NDI）捐款。
鄭宇碩接受Emily查詢時確認，呢個張達明曾做過佢助理，話對方喺佢電腦「我的檔案」非法盜取資料，鄭宇碩強調，真普聯無接受海外組織捐款，資金「來來去去係本地幾個人」，當時收嘅每一筆捐款，都有向真普聯報告，形容同外國組織「一啲關係都無、掂都唔敢掂」，佢話真普聯財政公開，所以有關指控係絕對錯誤。
