溫故知新
呢個世界
永遠有傻仔
【香港奇案】牛奶種菌騙案
喺香港,有唔少人都搵錢至上,而且搵得愈快愈好。唔少人就利用呢種急功近利嘅心態設個騙局,响上世紀九十年代,就有一單好出名嘅騙案,就係種菌騙案。
當時,有一位叫華氏嘅澳洲籍男子,响1991年喺香港開設咗一間公司,呢間公司聲稱以通過牛奶培植一種特別嘅菌,用作製造化妝品嘅重要材料。另外,公司就招攬市民成為會員,投資種菌。會員先要响公司購買種菌配方,再將培植出嚟嘅菌交俾公司,就會有報酬。另外,會員只要介紹其他人做會員,成為下線,亦可以得到佣金。由於前期會員的確收到回佣,有會員仲話賺咗層樓返嚟,咁易發達自然吸引咗唔少市民俾錢做會員。
不過,呢個其實只係一個騙局,呢間公司所謂嘅種菌業務根本係假嘅,而所謂會員回佣同發展下線只係龐氏騙局。最初有傳媒揭發呢間公司有問題,但唔少會員對公司仲係深信不疑,直至公司突然倒閉投資者先知原來被人呃咗。
記得電影《至尊無上》有一段對白,就係話咁老土嘅騙局點解都有人信,答案就係貪心,一日有人貪心一日就有千局存在。