喺兩間瑞士背景嘅銀行工作好多年。其中有 18 個月住蘇黎世。其餘時侯每年最少去一次瑞士。直屬上司係瑞士人。工作上自己所屬團隊有七成係瑞士人。我對瑞士同瑞士人嘅印象同文中嗰位小姐好唔同...
蘇黎世生活絕對唔平,甚至可以話貴。搞到人人都好緊張搵錢。唔明點解報導入面位小姐話瑞士人冇買樓壓力。我認識喺當地嘅無論係本地人或者 expats,個個都好注重置業同投資... 另外,瑞士人沉迷股票買賣嘅程度遠超過香港人或者美國人。炒股票可以話係瑞士人嘅 national pass time。佢地習慣好早返到公司。但係返到去第一樣嘢就係開電腦睇股票,等開市。跟著成日一路做嘢一路開著另一個 mon 睇住啲股票。成個部門一半人以上係咁。有一次我問佢地其中一個,話辦工時間內咁會唔會唔係幾好。佢話,”they can complain when I am not doing my work.“ 平時食晏或者喺 pantry 飲杯咖啡,講嚟講去都係得投機炒賣呢個話題。有一個同事話一到星期五下晝就好失落,因為星期六、日冇市。一到星期日黃昏個人就興奮晒,期待著聽朝開市...
真係每一個人嘅經歷唔同,對同一樣嘢可以有好唔同睇法...