• 瀏覽: 970
難杜天下悠悠之口 - 左丁山
https://hk.appledaily.com/column ... UCJCYNA3HSAUUTEJ4N4/


灣仔民政事務專員叫做陳天柱,冇乜人識。新界北總區刑事總部高級警司陳天柱見記者講721事件,就一雷天下響,街知巷聞,以後講親陳天柱個名,九成九市民都會以為係講陳天柱高級警司,唔會係灣仔陳天柱J.P.(太平紳士)。男孩子出世,父母為之取名天柱,肯定係對孩子期望甚殷,寄以厚望。



天柱者,擎天柱也,擎天一柱,一柱擎天,直情係國家棟樑,保家衛國之材,大有單天保至尊之氣概,挽狂瀾之既倒,捨我其誰!十分有霸氣。古代神話中,擎天有八柱,現在已知特區政府有兩個陳天柱,一文一武,他日如能拍住上,一個做政務司司長,一個做警務處處長,香港大局一定好,雖無八柱齊全,雙柱已能頂住半邊天不會塌下來。能頂住天不會塌下來,香港點會不安定繁榮呀。

取名天柱,如果身高七呎以上,似姚明,似昔日穆鐵柱(仲有冇人記得佢,一支木咁企喺籃底,直情係一條鐵柱,唔識走動),就氣勢增加不少,如果身高如美斯,就唔夠威風咯,14億人之中,只有一個姚明,不要苛求嘅話,陳天柱高得像李明逵(6呎4吋)也好似樣,起碼做到副處長。

可是陳警司威風有餘,文字修養有偏差,講到721白衣人打人事件,暢論「旗鼓相當,勢均力敵」,佢語出驚人,一聽就知道陳高級警司心裏有偏差,想指鹿為馬,將白衣人無差別打西鐵乘客事件嘅歷史重寫為白衣人黑衣人互相毆鬥,黑衣人由林卓廷煽動囉。所有當晚睇電視直播嘅市民,除非眼睛染上深藍色變成墨鏡,將白色睇成黑色,都唔會理解陳高級警司講甚麼。佢話直播鏡頭單向,唔夠全面,言下之意,可能係警方有齊全部西鐵站內之CCTV鏡頭錄影帶嘅全部,再加上有埋全部元朗西鐵站外街頭之CCTV錄影帶,警察睇過晒,用咗一年時間反覆檢視先至夠膽講電視鏡頭係單向不夠全面。陳天柱高級警司如想服眾,不如將全部佢仔細檢視過嘅紀錄發放予香港電視與網站,讓全港市民睇一次原汁原味無刪節版本,夠唔夠膽呀?還是要請高志森大導演剪輯過先至拿出來示眾?香港電台製作之鏗鏘集專輯講721事件,已獲國際獎牌,人人讚好,如今陳天柱要翻案就憑佢講一兩句「旗鼓相當,勢均力敵」?佢識唔識「眾口鑠金」之本義?
。。。。。。。。。

香港警察居然要改寫歷史,不要找個手騰口震的角色出來出醜,這條柱早就生了蛀蟲靠不住。



[按此隱藏 Google 建議的相符內容]