• 瀏覽: 3,131
+3
Executive日記——旗袍主題郵票 出自HKDI同學手筆

        
Executive日記 - KellyChu 2017-10-17  




羅漪靖(右一)同陳穎琳(左一)脫穎而出,插畫被挑選發行成郵票。        旗袍係中國傳統女性服裝,Kelly覺得佢展現中國女性嘅體態美同韻味,好靚!香港郵政會喺今日發行一套以「旗袍」為題嘅郵票,回顧旗袍嘅演變。郵票上嘅插畫由香港知專設計學院(HKDI)嘅同學仔繪畫,其中郵票小型張嵌有首次推出嘅布料旗袍形郵票,好特別!

        HKDI視覺藝術與文化高級文憑課程嘅十幾位學生,獲香港郵票策劃及拓展署邀請,畫咗一系列展示旗袍演變嘅插畫,最後羅漪靖同陳穎琳脫穎而出,插畫被挑選發行成郵票。佢哋為咗設計呢套郵票,除咗參考有關旗袍嘅書以外,仲透過HKDI講師向本地旗袍大師請教,去深入了解旗袍嘅特色。兩位同學心思縝密,連模特兒面上嘅妝容同旗袍嘅線條,每個細節都好用心繪畫,去呈現返各個時代嘅特色。佢哋話希望透過作品,加深大眾對旗袍嘅認識。

呢套郵票共有六枚,每張郵票都分別刻畫二十至七十年代嘅旗袍特色。例如一九二○年代嘅旗袍,繼承咗清代長袍寬闊平直嘅特點,裙襬長及小腿至足踝之間。香港郵政同時推出郵票小型張,附有一枚面值十蚊或二十蚊嘅旗袍形郵票,後者更係以塔夫綢布料製作嘅紙張印製而成㗎!

Kelly Chu
KellyChu 博客



主題標籤 #香港郵政
[按此隱藏 Google 建議的相符內容]